Sesorah

Sesorah yaiku medharake gagasan kanthi lisan ing sangarepe wong akeh.

Rantamaning sesorah :

1.     Salam Pambuka

Ngaturaken salam ingkang sepindah marang para rawuh.(manut kapitadosan saha swasananipun).

2.    Purwaka

Atur syukur dhumateng Gusti Ingkang Maha Agung lan atur panuwun marang para rawuh.

3.    Isi/wos sesorah

Isinipun bab utawa perkawis ingkang dipunwedharaken.

4.    Dudutan (simpulan)

Inti sarining bab bab ingkang sampun diwedharaken.

5.    Wasana (penutup)

Atur panuwun saha atur pangapunten anggenipun nampa tamu utawa wonten tetembungan ingkang kirang becik.

Metode-metode sesorah :

1.     Metode Apalan

Sesorah ingkang ditindakaken kanthi apalan, nanging saderengipun sampun damel seratan sesorah.Cara menika asring dipunginakaken dening lare-lare ingkang nembe ajar.

2.    Metode Naskah

Sesorah ingkang ditindakaken kanthi waos sawetahipun, boten dipunapalaken. Cara menika asring dipunginakaken dening pejabat ing adicara-adicara resmi.

3.    Metode Ekstemporan

Sesorah ingkang ditindakaken kanthi ngasta utawi damel cathetan alit minangka pangemut-emut urutaning ingkang badeh dipun ngendikakaken. Cara menika asring dipunginakaken dening tiyang ingkang prigel sesorah.

4.    Metode Impromtu (dadakan)

Sesorah ingkang ditindakaken kanthi dadakan utawa spontan. Cara menika asring dipunginakaken dening tiyang ingkang sampun trampil ing pamicara saha kathah pengalamanipun.

Jinis –jinising sesorah :

1.     Miturut ancase (tujuan) :

a.    Menehi informasi / pemanggih

b.    Menehi panglipur

c.    Kangge pangajak-ajak

2.    Miturut kahanane sesorah :

a.    Sesorah resmi

b.    Sesorah setengah resmi

c.    Sesorah mboten resmi

3.    Miturut pendekatan isinipun sesorah :

a.    Sesorah intelektual

b.    Sesorah moral

Tuladha Sesorah

PENGETAN DINTEN KARTINI

Sugeng Enjeng,

Bapak Kepala sekolah ingkang kinurmatan.

Bapak, Ibu Guru ingkang satuhu luhuring budi.

Para kanca, siswa-siswi ingkang kula tresnani.

Sumangga kita ngaturaken puji lan syukur dhumateng Gusti Ingkang Maha Agung ingkang sampun paring rahmatipun kagem kita sedoyo wontening pengetan Dinten Kartini.

Raden Ajeng Kartini lair ing Jepara, Jawa Tengah,surya 21 April 1879. Nalika jamanipun Raden Ajeng Kartini menika, para wanita mboten ngadahi kabebasan kangge srawung dateng masyarakat umumipun. Para wanita dipun anggep mboten ngadahi  drajad kados dene kakung, mila lajeng dipun wastani kanca wingking. Perkawis menika dados kaprihatosannipun Raden Ajeng Kartini, mila lajeng ngadahi reka daya murih wanita ngadahi hak ingkang sami kaliyan kakung, sinaosa mboten nilar khodratipun minangka wanita, kanthi ngawonten pawiyatan kagem para wanita. Kanthi pawiyatan kala wau, ing pangajab saget ngadahi kaprigelan, wawasan ingkang saget mbiantu dateng kridanipun para kakung, kagem ngayuh kamardikan.

Namung dereng ngantos dumugi pawiyatan inggil, Raden Ajeng Kartini tutup yuswa nalika tanggal 17 September 1904, pinaringan yuswa 25 taun. Namung cita-citanipun Raden Ajeng Kartini tetep dados cikal bakal gumigrahipun para wanita, kagem nglajengaken perjuangannipun Raden Ajeng Kartini, kasunyatan cita-cita ingkang luhur menika saged dipun rasakaken ing jaman sakmenika, kathah para wanita ingkang sampun ngadahi drajad pangkat pendidikan ingkang sami kaliyan kakung, kathah wanita ingkang ngadahi titel sarjana, wonten ingkang dados menteri, wonten polwan, wonten perangkat desa, kepara dados presiden, lan sanes-sanesipun.

Mila perjuanganipun Raden Ajeng Kartini sumangga kita lajengaken murih saged dados wanita ingkang mandiri nanging mboten nilar khodratipun wanita.

Mekaten atur kula, menawa wonten kirang langkungipun, nyuwun pangapunten.

Matur Nuwun.

Sugeng Enjeng.